ព្រះសាសនមុនី ហ៊ឹម ប៊ុនធឿន បាននិមន្តចូលរួមពិធីបុណ្យសព មហាឧបាសិកាពុទ្ធសាសនូបត្ថម្ភក៍ ជឹម សៀត
━━━━━━✥◈✥━━━━━━
ខេត្តកំពង់ចាម នារសៀល,ថ្ងៃអាទិត្យ ១៣ រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែមីនា ឆ្នាំ២០២៣ ព្រះសាសនមុនី មហាកម្មដ្ឋានាចរិយ ហ៊ឹម ប៊ុនធឿន ធម្មត្ថេរោ ព្រះរាជាគណៈថ្នាក់ទោ គណៈមហានិកាយ សមាជិកថេរសភាសង្ឃជាន់ខ្ពស់ នៃព្រះពុទ្ធសាសនាកម្ពុជា និងជាប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ព្រះសង្ឃ អគ្គមហាឧបាសិកា មហាសទ្ធម្មជោតិកធជៈ សុខ អ៉ីម បាននិមន្ត-អញ្ជើញចូលរួមរំលែកមរណទុក្ខ នឹងបាននាំមកជាមួយនូវទេយ្យទាន ថវិកា ដើម្បីចូលរួមបង្សុកូល សពមហាឧបាសិកាពុទ្ធសាសនូបត្ថម្ភក៍ ជឹម សៀត ហៅ ប៉ុក ត្រូវជាញោមស្រីបង្កើតរបស់សម្តេចព្រះឧត្តមចរិយាបណ្ឌិត ឈឹង ប៊ុនឈា អនុប្រធានថេរសភាសង្ឃជាន់ខ្ពស់ នៃព្រះពុទ្ធសាសនាកម្ពុជា ដែលបានទទួលមរណភាព កាលពីថ្ងៃសៅរ៍ ១២ រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៨ ខែមីនា ឆ្នំា២០២៣ វេលាម៉ោង ១១: ២៩ នាទីព្រឹក ក្នុងជន្មាយុ ៧២ ឆ្នាំ ដោយរោគាពាធ ។
ឆ្លៀតក្នុងសមានទុក្ខដ៏ក្រៀមក្រំ ដោយក្តីសង្វេគនេះ ព្រះសាសនមុនី មហាកម្មដ្ឋានចារិយ ព្រះសង្ឃ អគ្គមហាឧបាសិកា មហាសទ្ធម្មជោតិកធជៈ បានចូលរួមរំលែកទុក្ខជាមួយសម្តេចព្រះឧត្តមចរិយាបណ្ឌិត ឈឹង ប៊ុនឈា ចំពោះការបាត់បង់នូវញោមស្រីជាទីស្រឡាញ់នាពេលនេះ និងបានផ្សាយនូវមហាកុសលទាំងឡាយចំពោះវិបាកបដិសន្ធិវិញ្ញាណ នៃសព មហាឧបាសិកាពុទ្ធសាសនូបត្ថម្ភក៍ ជឹម សៀត ហៅ ប៉ុក សូមបានទៅបដិសន្ធិក្នុងសុគតិភពសួគ៌ទេវលោក និងទីបំផុតនៃជាតិ សូមបានដល់នូវព្រះនិព្វាន ។ ពិធីបុណ្យសព ត្រូវបានតម្កល់ធ្វើបុណ្យទក្ខិណានុប្បទានតាមប្រពៃណីពុទ្ធសាសនា ស្ថិតនៅភូមិបន្ទាយជ័យ ឃុំស្ពឺ ស្រុកចំការលើ ខេត្តកំពង់ចាម ៕
ថ្វាយ-ប្រគេន-ជូនបុណ្យធម្មមិត្តគ្រប់រូប ! អនុមោទនា !
