ការស្តាប់ ជាការចំរើននៃបញ្ញា
━━━━━✥◈✥━━━━━
ការស្តាប់ដោយល្អ ជាការចំរើននៃអ្នកស្តាប់ ការស្តាប់ ជាការចំរើននៃបញ្ញា (ព្រោះ) បុគ្គល រមែងយល់សេចក្តីបានដោយសារបញ្ញា សេចក្តីដែលយល់ហើយ រមែងនាំសុខមកឲ្យ។
បុគ្គលគួរសេពសេនាសនៈស្ងាត់ គួរប្រព្រឹត្តធម៌ ដែលជាហេតុរួចស្រឡះចាកសំយោជនៈ បើមិនបានសេចក្តីត្រេកអរក្នុងទីស្ងាត់នោះទេ គប្បីជាអ្នកមានសតិ រក្សាខ្លួននៅក្នុងពួកចុះ។ (បិដកភាគ ៥៦ ទំព័រ ១៧៨)
ថ្ងៃ និងយប់ តែងកន្លងទៅ ជីវិត រមែងរលត់ទៅ អាយុរបស់សត្វទំាងឡាយ រមែងអស់ទៅ ដូចទឹកស្ទឹងតូច។ (បិដកភាគ ៥៦ ទំព័រ ១៧៨)
នាយប់ថ្ងៃសុក្រ ១២ ខែផល្គុន ឆ្នាំខាល ចត្វាស័ក ព.ស.២៥៦៦
សិក្ខាកាមយោគាវចរបដិបត្តិសមាទានធុតង្គវត្ត ក្រោយពីគង់-អង្គុយ និងចង្ក្រមភាវនាកម្មដ្ឋាន តាំងពីព្រឹក រហូតដល់រាត្រីកាល ស្ថិតក្រោមពន្លឺនៃដួងខែដ៏ស្រទន់ នៃថ្ងៃ១២ កើត ខែផល្គុន និងមានព្រះវាយោបក់ផាត់មករំភើយៗ នៅមុខទីលានព្រះអង្គធំ ព្រៃធុតង្គ ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ប្រកបដោយវិរិយភាព និងមានបីតិបាមោជ្ជសោមនស្សភាព និងជាទីជ្រះថ្លាក្រៃលែង ។
ដោយអំណាចនៃការបដិបត្តិចម្រើនធុតង្គវត្ត សូមឲ្យសព្វសត្វបាននូវសេចក្តីសុខ ចូរកុំឲ្យមានពៀរនឹងគ្នា ចូរកុំឲ្យមានរោគ ចូររក្សាខ្លួនជាសុខតរៀងទៅ ។
ថ្វាយ ប្រគេន ជូនបុណ្យធម្មមិត្តគ្រប់រូប ! សូមអនុមោទនា !
