បច្ច័យទាំងឡាយ ៤ សម្រាប់បព្វជិតអ្នកបួសក្នុងពុទ្ធសាសនារួមមាន បិណ្ឌបាត គឺអាហារសម្រាប់ទ្រទ្រង់រូបកាយជាដើម ចាត់ចូលក្នុងបច្ច័យទាំងឡាយ ៤ផងដែរ ។
សេចក្ដីពិចារណាក្នុងការប្រើប្រាស់បិណ្ឌបាតប្បច្ច័យ ក៏ដូចជាបច្ច័យទាំងឡាយ៣ទៀតដែរ ពោលគឺគ្រាន់តែញ៉ាំងរាងកាយ និងជីវិតឲ្យតាំងនៅដើម្បីប្រតិបត្តិធម៌ ជម្រះចិត្តឲ្យបរិសុទ្ធផូរផង់ប្រាសចាករាគៈ ទោសៈ មោហៈ ដែលជាឫសគល់ នៃគ្រឿងសៅហ្មងនានា ។
ការត្រាច់ចរនិមន្តគោចរបិណ្ឌបាតប្រចាំថ្ងៃរបស់ព្រះភិក្ខុសង្ឃ នៅក្នុងគម្ពីរព្រះត្រៃបិដកផ្នែកព្រះសូត្រ នៃពុទ្ធសាសនា មានសេចក្ដីធៀបថា ដំណើរនៃហ្វូងសត្វភមរជាតិ គឺពពួកឃ្មុំជាដើមនេះ ដែលត្រាច់ចរទៅត្រឹបត្រងលំអងកេសរផ្កា ដោយមិនបណ្ដាលឲ្យអន្តរាយនូវស្រទាប់ផ្កាយ៉ាងណា ភាពបរិសុទ្ធផូរផង់នៃដំណើរត្រាច់និមន្តបិណ្ឌបាតរបស់ព្រះភិក្ខុសង្ឃនៅតាមនិគមជននានា ក៏នឹងមិនត្រូវធ្វើឲ្យសប្បុរសជន អ្នកម្ចាស់ទាន មានសេចក្តីរង្កៀសដោយប្រការណាមួយដោយការសុំរបស់បព្វជិតក៏យ៉ាងនោះដែរ ៕
