ព្រះសាសនមុនី ហ៊ឹម ប៊ុនធឿន និមន្តចូលរួមជាព្រះគណៈអធិបតីក្នុងពិធីប្រគេនរង្វាន់លើកទឹកចិត្តដល់សមណសិស្សប្រឡងបាននិទ្ទេសឆ្នើមចំនួន ៤៧ អង្គ ដែលកំពុងសិក្សាទ្រទ្រង់បដិបត្តិព្រះធម៌វិន័យ ផ្នែកគន្ធធុរៈ (បរិយត្តិធម៌) ឆ្នាំសិក្សា ព.ស.២៥៦៦
នាព្រឹកថ្ងៃពុធ ២ រោច ខែអស្សុជ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១២ ខែតុលា ឆ្នាំ២០២២ នៅពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា មានប្រារព្ធពិធីប្រគេនរង្វាន់ជ័យលាភីដល់សមណសិស្សប្រឡងបាននិទ្ទេសឆ្នើម ក្នុងការសិក្សាទ្រទ្រង់បដិបត្តិព្រះធម៌វិន័យ ផ្នែកគន្ធធុរៈ (បរិយត្តិធម៌) ឆ្នាំសិក្សា ព.ស.២៥៦៦ ក្រោមព្រះអធិបតីភាព៖
- ព្រះសាសនមុនី មហាកម្មដ្ឋានាចរិយ ហ៊ឹម ប៊ុនធឿន ធម្មត្ថេរោ ប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា និងមានការនិមន្តចូលរួមពីមន្ត្រីសង្ឃ៖
- ព្រះបាឡាត់សាសនរក្ខិតមុនី ប៉ាច សុផុន ការិយាល័យរដ្ឋបាលសង្ឃ
- ព្រះគ្រូឋិតធម្មរង្សី អ៉ី ចាន់អៀង ព្រះធម្មាចារ្យគ្រូបន្ទុកប្រចាំថ្នាក់
- ព្រះភិក្ខុអប្បមត្តោ ជា ឌីណា ព្រះធម្មាចារ្យគ្រូបន្ទុកប្រចាំថ្នាក់
- សមណសិស្សទទួលបានជ័យលាភីនិទ្ទេសឆ្នើម សរុបទាំងអស់ ៤៧ អង្គ ។
ព្រះសាសនមុនី ក្រោយពីនិមន្តចូលរួមលើកទឹក ប្រគេនរង្វាន់ជ័យលាភីដល់សមណសិស្សរួចមក ព្រះអង្គគ្រូ មានព្រះថេរដីប្រទានឱវាទផ្តាំផ្ញើជម្រុញលើកទឹកចិត្តដល់សមណសិស្សគ្រប់អង្គថា៖
យុវសមណសិស្ស ឬនវសាមណេរ គឺជាធម្មទាយាទ ជាទំពាំងស្នងប្ញស្សី និងជាសរទ្រូងបន្តអាយុកាល នៃព្រះពុទ្ធសាសនា ត្រូវតែបណ្តុះឆន្ទៈ យោនិសោមនសិការៈ ឥទ្ធិបាទធម៌ វិរិយធម៌ ខន្តិធម៌ អ្នកបួសត្រូវតែសិក្សាទ្រទ្រង់ ផ្សព្វផ្សាយបដិបត្តិនូវព្រះពុទ្ធវចនៈទាំងគន្ធធុរៈ និងវិបស្សនាធុរៈ ឲ្យបានខ្ជាប់ខ្ជួន កុំឲ្យមានសេចក្តីធ្វេសប្រហែស មានកោសជ្ជៈ ព្រោះថា ព្រះពុទ្ធសាសនាអាចតាំងនៅឋិតឋេរទៅបាន ដោយសារសមណៈ មានការទ្រទ្រង់សិក្សារៀនសូត្រ មានចំណេះដឹងទាំងបរិយត្តិ និងបដិបត្តិឲ្យបានប្រត្យ័ក្ស ទើបព្រះពុទ្ធសាសនាមានការរីកចម្រើនរុងរឿងជាភិយ្យោភាព ។
សូមឲ្យព្រះសទ្ធម្មនៃព្រះបរមគ្រូតាំងនៅស្ថិតថេរអស់កាលដ៏យូរអង្វែរ និងសូមឲ្យពិភពលោកទាំងមូលមានសុខសន្តិភាព និងមានវឌ្ឍនភាពនិរន្តរ៍តរៀងទៅ ។
