ថ្ងៃព្រហស្បតិ៍ ១៣ កើត ខែជេស្ឋ ឆ្នាំថោះ បញ្ចស័ក ព.ស. ២៥៦៧ ត្រូវនឹងថ្ងៃទី០១ ខែមិថុនា ឆ្នំា២០២៣
ព្រះសាសនមុនី ហ៊ឹម ប៊ុន ធឿន និមន្តជាព្រះអធិបតីប្រទានឱវាទ
បើកវគ្គបដិបត្តិវិបស្សនាវគ្គខ្លី រយៈពេល ៧ ថ្ងៃ លើកទី៤២
━━━━━━━━✥◈✥━━━━━━━━
ព្រះសាសនមុនី មហាកម្មដ្ឋានាចរិយ ហ៊ឹម ប៊ុន ធឿន ធម្មត្ថេរោ ប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា និមន្តជាព្រះអធិបតីប្រទានឱវាទ ពិធីបើកវគ្គបដិបត្តិវិបស្សនា វគ្គខ្លី រយៈពេល ៧ ថ្ងៃ លើកទី៤២ ។ នៅក្នុងពិធីនេះ មានការនិមន្ត-អញ្ជើញចូលរួមពី៖
– ព្រះវិបស្សនាចារ្យកោវិទ ខឹម សុខឿន អនុប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា
– ព្រះខន្តិរក្ខិតញាណ ងិន ច័ន្ទសារូ អនុប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ជាទីគោរពសក្ការៈ !
– ព្រះសីលវិបស្សនាញាណ ម៉ម ឥន្ទ អនុប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ជាទីគោរពសក្ការៈ !
– ព្រះរាជាគណៈ ព្រះមន្ត្រីសង្ឃ ព្រះធម្មាចារ្យ ព្រះថេរានុត្ថេរៈ
– ធម្មាចារិនី ឧបាសក និងឧបាសិកា ដែលជាសិក្ខាកាមមានចំនួន ១៨០ អង្គ/នាក់ បានថ្វាយខ្លួនសមាទាន បដិបត្តិវិបស្សនាវគ្គខ្លី មានរយៈពេល ៧ ថ្ងៃ លើកទី៤២ ដោយចាប់ផ្តើមពីថ្ងៃព្រហស្បតិ៍ ១៣ កើត ដល់ថ្ងៃពុធ ៤ រោច ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី០១ ដល់ថ្ងៃទី០៧ ខែមិថុនា ឆ្នំា២០២៣ នៅសាលាវិបស្សនា (ព្រៃធុតង្គ) ។
ការបើកវគ្គបដិបត្តិវិបស្សនា វគ្គខ្លីនេះ ពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជាបានដំណើរការចាប់ផ្តើមលើកដំបូងតាំងពីដើមឆ្នាំ២០១៥ លើកទី១ រហូតមកដល់លើកទី៤២នេះ បានប្រព្រឹត្តទៅប្រកបដោយបីតិសោមនស្សភាព ក្រោមការគ្រប់គ្រងដឹកនាំចាត់ចែងរបស់ ព្រះសាសនមុនី មហាកម្មដ្ឋានាចរិយ ហ៊ឹម ប៊ុន ធឿន ធម្មត្ថេរោ និងមានការជួយឧបត្ថម្ភគាំទ្រជា “ថវិកា ទេយ្យវត្ថុ ចង្ហាន់បិណ្ឌបាត ភេសជ្ជៈ និងសេនាសនទាន” ពីអគ្គមហាឧបាសិកាពុទ្ធសាសនូបត្ថម្ភក៍ មហាសទ្ធម្មជោតិកធជៈ សុខ អ៉ីម ព្រមទាំងបុត្រ និងចៅ រួមជាមួយសប្បុរសជននានា ធ្វើឲ្យដំណើរការនៃកិច្ចបដិបត្តិសមថ-វិបស្សនាកម្មដ្ឋាន បានប្រព្រឹត្តទៅ គួរជាទីជ្រះថ្លាយ៉ាងក្រៃលែង ។ ការសិក្សាបដិបត្តិព្រះធម៌វិន័យ ផ្នែកវិបស្សនាធុរៈ គឺដើម្បីពង្រឹងកិច្ចបដិបត្តិ “សីល សមាធិ បញ្ញា” ទៅតាមព្រះពុទ្ធោវាទដែលព្រះពុទ្ធជិនស្រី ទ្រង់ត្រាស់សម្តែងដោយធម្មបរិយាយមានក្នុងគម្ពីរព្រះត្រៃបិដក ព្រះអដ្ឋកថា និងគម្ពីរវិសុទ្ធិមគ្គជាគោល ។ គោលបំណងនៃកិច្ចប្រណិប័តន៍ គឺដើម្បីពង្រឹងស្វ័យសិក្សា ឲ្យកាន់តែប្រសើរឡើងទាំង”គន្ធធុរៈ និងវិបស្សនាធុរៈ” ឲ្យមានគុណតម្លៃសុខដុមនីយកម្មសាសនា ធ្វើឲ្យសម្រេចបាននូវគុណធម៌ និងធ្វើឲ្យជាក់ច្បាស់នូវលោកុត្តរធម៌ ។
ព្រះសទ្ធម្មជាច្បាប់សម្រាប់ប្រដៅមនុស្សឱ្យស្ងប់ ឱ្យប្រព្រឹត្តត្រឹមត្រូវ បានដល់ធម៌របស់សប្បុរសគឺធម៌របស់បុគ្គលដែលស្ងប់ចាកគ្រឿងសៅហ្មងទាំងពួង ។ ការសិក្សាព្រះបរិយត្តិ និងបដិបត្តិដោយសេចក្តីសោមនស្សជ្រះថ្លារបស់ភិក្ខុ សាមណេរ ឧបាសក ឧបាសិកា ក្នុងសាសនានេះ ឈ្មោះថា ជាអ្នកគោរពកោតក្រែងចំពោះព្រះសាស្តា គោរពកោតក្រែងចំពោះព្រះធម៌ គោរពកោតក្រែងចំពោះព្រះសង្ឃ គោរពកោតក្រែងចំពោះសិក្ខា និងជាអ្នកគោរពកោតក្រែងចំពោះសមាធិផងដែរ ។ បើពុទ្ធបរិស័ទទាំង ៤ បានសិក្សា ទ្រទ្រង់បដិបត្តិព្រះធម៌វិន័យ ជាគឺសសរស្តម្ភគោលគ្រឹះដ៏រឹងមាំ នៃព្រះពុទ្ធវចនៈ ដែលលោកអ្នកប្រាជ្ញខាងព្រះពុទ្ធសាសនាហៅថា ព្រះសទ្ធម្មមាន ៣ ប្រការគឺ៖ ការរៀនចេះចាំ ការបង្រៀន កាសម្ដែងនូវមគ្គ និងផល នោះជាបរិយត្តិធម៌ ១ ការប្រឹងប្រែងប្រតិបត្តិប្រព្រឹត្តទៅតាមអង្គមគ្គ ចាត់ចូលជាបដិបត្តិ ១ និងការបានសម្រេចចាក់ធ្លុះនូវអង្គមគ្គ នោះជាបដិវេធៈ ១ ។
ខ្លឹមសារអត្ថន័យ នៃព្រះសទ្ធម្មមានសេចក្តីបរិយាយដោយសង្ខេបដូចខាងក្រោម៖
១-បរិយត្តិធម៌ ពុទ្ធវចនៈ ព្រះត្រៃបិដកសំដែងអំពីគោលធម៌ របៀបបែបផែន ដំបូន្មាន ច្បាប់សម្រាប់ប្រតិបត្តិដែលពុទ្ធបរិស័ទត្រូវរៀនស្វាធ្យាយ ទ្រទ្រង់ បង្ហាត់បង្រៀន សម្ដែងប្រាប់ដល់អ្នកដទៃ ហៅថា បរិយត្តិធម៌ ។
២-បដិបត្តិធម៌ ធម៌សម្រាប់ប្រតិបត្តិប្រព្រឹត្តតាម បានដល់សីល សមាធិ បញ្ញា ឬសេចក្ដីប្រតិបត្តិតាម ធ្វើតាម កាន់តាមនូវធម៌ដ៏សមគួរដល់ធម៌ដែលខ្លួនបានរៀន បានស្ដាប់ បានចេះដឹង ដើម្បីឲ្យដល់នូវធម៌ដែលខ្លួនមិនទាន់ដល់ ឲ្យសម្រេចនូវធម៌ដែលខ្លួនមិនទាន់បានសម្រេច ដើម្បីឲ្យជាក់ច្បាស់នូវខ្លឹមនៃធម៌ ។
៣-បដិវេធធម៌ ការត្រាស់ដឹង បានដល់កិរិយាបានសម្រេច បានជាក់ច្បាស់ចាក់ធ្លុះនូវបរមត្ថ គឺមគ្គ ផល និព្វាន ដែលជាផលសម្រេចអំពីការរៀន ការស្ដាប់ និងការប្រតិបត្តិ ។
– វេនេយ្យសត្វ ប្រៀបដូចអ្នកដំណើរ
– ព្រះសម្ពុទ្ធ ទុកដូចអ្នកស្គាល់ផ្លូវ អ្នកបង្ហាញផ្លូវ
– បរិយត្តិធម៌ ដូចជាផ្លូវត្រង់
– បដិបត្តិធម៌ ដូចជាដំណើរទៅតាមផ្លូវត្រង់នៃអ្នកដំណើរ
– បដិវេធធម៌ ទុកដូចជាដំណើរទៅដល់កន្លែងដែលត្រូវទៅឲ្យដល់នៃអ្នកដំណើរ ។
ដោយតេជានុភាព នៃការបើកវគ្គបដិបត្តិវិបស្សនា សូមឲ្យសាសនប្បដិបត្តិ ទុកជាមគ្គុទ្ទេសក៍សម្រាប់ចង្អុលបង្ហាញផ្លូវក្នុងដំណើរជីវិតដល់សាធុសប្បុរស បានប្រព្រឹត្តតាមផ្លូវព្រះអរិយមគ្គ ប្រកបដោយអង្គ ៨ ជាដំណើររួចចាកសេចក្តីទុក្ខ ពោលគឺព្រះនិព្វានគ្រប់គ្នាទៅហោង ។
ថ្វាយ ប្រគេន ជូន បុណ្យធម្មមិត្តគ្រប់រូប ! សូមបង្អោនចិត្តជ្រះថ្លាត្រេកអរ អនុមោទនា !!!
![](https://scontent.fpnh24-1.fna.fbcdn.net/v/t39.30808-6/350537110_771021321431542_6107054588502937346_n.jpg?_nc_cat=109&ccb=1-7&_nc_sid=730e14&_nc_eui2=AeE5P8amhfgWlO-BYmC6BFE0oKdDn1598Tegp0OfXn3xN4z5UmRsowq1mFWt-JnVePopP2OOYHNm7cAUCFmQWOur&_nc_ohc=_waaGgfxNVgAX8jDIX8&_nc_ht=scontent.fpnh24-1.fna&oh=00_AfDbb_0Xap75mJfdsiIjOHIcYAFEfYM7sKhudEW1KdLLuA&oe=6481A45E)
![](https://scontent.fpnh24-1.fna.fbcdn.net/v/t39.30808-6/350780734_804679577555697_4277372384730220103_n.jpg?_nc_cat=107&ccb=1-7&_nc_sid=730e14&_nc_eui2=AeH_l0j_2_MXAQN77KCkBKrrTgZhPur8aJ9OBmE-6vxon1TOK3KWRpWoUgKa5FIgiVfpTnwJs8koIUbAQSHW_dTc&_nc_ohc=tCJt2tT1mrYAX-DrPwD&_nc_ht=scontent.fpnh24-1.fna&oh=00_AfBwBRsnruiiI7h6EyYpj5j4Q6pRF7jsKxeS1YQ4UVM4EQ&oe=6482D11E)
![](https://scontent.fpnh24-1.fna.fbcdn.net/v/t39.30808-6/350642025_264684059449747_8934556602502322181_n.jpg?_nc_cat=100&ccb=1-7&_nc_sid=730e14&_nc_eui2=AeEuuiFb_mxDayTpeC7Db9JfLzvlHqyCA54vO-UerIIDntXmuLDoFrt3dc6HKokVbzB9W9S4f3NsSUKwtjahmNCj&_nc_ohc=Tzx8ciHyRQQAX921Fie&_nc_ht=scontent.fpnh24-1.fna&oh=00_AfAqgxb2KHdJD19eBIJA_4z6KAEp4yjzz7yjKpMva01hiw&oe=648162CD)
![](https://scontent.fpnh24-1.fna.fbcdn.net/v/t39.30808-6/350995883_215967507959420_8139753883931219543_n.jpg?_nc_cat=110&ccb=1-7&_nc_sid=730e14&_nc_eui2=AeEiTiMYnrLCFm40J20-7NyCIfndUAwREKAh-d1QDBEQoHMAknebhJsuIw6tmXQxBAI-bWUmyYsi-WsHBa2p9GlK&_nc_ohc=9OpkKx-hUZgAX9CBc2i&_nc_ht=scontent.fpnh24-1.fna&oh=00_AfCwqtO7O_RlzLDr5rVvlwN_vBKYfAob6Q02G_a6VCuoRA&oe=64829E1E)
![](https://scontent.fpnh24-1.fna.fbcdn.net/v/t39.30808-6/350780998_6303482473076806_7943593193743633864_n.jpg?_nc_cat=100&ccb=1-7&_nc_sid=730e14&_nc_eui2=AeFMcoa_JH7Mlo58363mtbWRyl11uWli2WzKXXW5aWLZbApwjCBOs3e8ZegYdMZx61QdzUpB64Lcoq6EU3VOJ8LS&_nc_ohc=JEUvO1iBRPwAX__7hMH&_nc_ht=scontent.fpnh24-1.fna&oh=00_AfAHVlhvw_YT85EbxOE-6PG9FXlzFhTSbP-1GCR9ULYvsg&oe=64814583)
![](https://scontent.fpnh24-1.fna.fbcdn.net/v/t39.30808-6/350972215_801102261543025_3031700559223743756_n.jpg?_nc_cat=105&ccb=1-7&_nc_sid=730e14&_nc_eui2=AeE8iiyShngeO0OxNSHYIBlp98lWOVp_X3P3yVY5Wn9fc-pYxjx2WwgyIHT7Nx7lwHo6QhiuPzBEI0kc0efn4epz&_nc_ohc=7THtTEhxS1kAX80z6aw&_nc_ht=scontent.fpnh24-1.fna&oh=00_AfCsyVhMWgieUnqg7Hus6YcxPpyShAYfW0-peIHfnAwu9Q&oe=64831CB7)