នាព្រឹកថ្ងៃសៅរ៍ ២ កើត ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៤ ខែធ្នូ ឆ្នាំ២០២២
ឧបាសក តាំង ផេងលាភ ឧបាសិកា អ៊ន់ លក្ខ័ណា ព្រមទាំងបុត្រ បាននិមន្តព្រះសាសនមុនី មហាកម្មដ្ឋានាចរិយ ហ៊ឹម ប៊ុនធឿន ធម្មត្ថេរោ ប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា ប្រទានឱវាទធម្មីកថាក្នុងថ្ងៃប្រារព្ធភត្តអាយុវឌ្ឍនមង្គល និងព្រះភិក្ខុសង្ឃ វេរសង្ឃតាទក្ខិណាទាន បវារណាទុកដាក់បច្ច័យ ៤ ប្រគេនព្រះសង្ឃ និងរាប់បាតដល់ព្រះសង្ឃ សីលវន្ត និងសីលវតី ដែលជាបដិគ្គាហកៈ ទ្រទ្រង់បដិបត្តិព្រះធម៌វិន័យ ផ្នែកវិបស្សនាធុរៈ ដើម្បីផ្សាយនូវកុសលជូនចំពោះបុព្វការីជនទាំងឡាយមាន៖ មាតាបិតា ជីដូន ជីតា និងញាតិកាក្នុងសង្សារវដ្ត ដូចព្រះពុទ្ធដីកា ព្រះមានព្រះភាគទ្រង់ត្រាស់សម្តែងក្នុងអច្ចេនិ្តសូត្រ ទី៤ បិដកភាគ ២៩ ទំព័រ ៦ មានសេចក្តីថា៖
កាលទាំងឡាយ តែងកន្លងផុតទៅ រាត្រីទាំងឡាយ តែងឆ្លងហួសទៅ ជំនាន់នៃវ័យទាំងឡាយ តែងលះបង់នូវលំដាប់ កាលបើបុគ្គលបានសំឡឹងឃើញភ័យនុ៎ះ ក្នុងសេចក្តីស្លាប់ហើយ ជាអ្នកសំឡឹងយកសេចក្តីស្ងប់ គួរតែលះបង់អាមិសៈ ក្នុងលោកចេញ។
ដោយតេជានុភាព នៃធម្មទាន និងអាមិសទាន ក្នុងឱកាសនេះ សូមឧបាសក ឧបាសិកា ព្រមទាំងបុត្រ ដែលបានបរិច្ចាគទ្រព្យធនបំពេញភត្តអាយុវឌ្ឍមង្គល មានសុខភាពល្អ សមប្រកបដោយពុទ្ធពរទាំងឡាយ ៤ ប្រការគឺ៖ អាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ ។
ថ្វាយ-ប្រគេន-ជូនបុណ្យធម្មមិត្តគ្រប់រូប ! សូមអនុមោទនា !
