គណៈធម្មយាត្រាព្រះសង្ឃ និងពុទ្ធបរិស័ទនិមន្ត-អញ្ជើញមកពីវត្តខ្មែរទីក្រុងហានណូយ ប្រទេសវៀតណាម យកវត្តប្រណិប័តន៍ ព្រះសាសនមុនី ហ៊ឹម ប៊ុនធឿន ធម្មត្ថេរោ និងនមស្ការថ្វាយបង្គំព្រះបរមសារីរិកធាតុ
━━━━━━━━━✥◈✥━━━━━━━━━
នាព្រឹកថ្ងៃច័ន្ទ ៥ កើត ខែពិសាខ ឆ្នាំថោះ បញ្ចស័ក ព.ស.២៥៦៦ ត្រូវនឹងថ្ងៃទី២៤ ខែមេសា ឆ្នាំ២០២៣ ព្រះសង្ឃ និងពុទ្ធបរិស័ទ និមន្ត-អញ្ជើញមកពីវត្តខ្មែរទីក្រុងហានណូយ ប្រទេសវៀតណាម (ចំនួន ៧៧ អង្គ/នាក់) បានយកវត្តប្រណិប័តន៍ថ្វាយបង្គំ ព្រះសាសនមុនី មហាកម្មដ្ឋានាចរិយ ហ៊ឹម ប៊ុនធឿន ធម្មត្ថេរោ ប្រធានពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា និងបានសម្តែងនូវធម្មបដិសណ្ឋារកិច្ចស្វាគមន៍អំពីកិច្ចបដិបត្តិសមថ-វិបស្សនាកម្មដ្ឋាន ជាខេមរភាសា ដ៏មានអត្ថន័យខ្លឹមសារជ្រាលជ្រៅក្នុងព្រះធម៌រួចមក ក៏បានប្រគេននូវទេយ្យទាន-វត្ថុអនុស្សាវរីយ៍ បវារណាទុកដាក់បច្ច័យ ៤ សម្រាប់ប្រគនព្រះសាសនមុនី ប្រើប្រាស់តាមពុទ្ធវិន័យផងដែរ ។
ក្រោយពីគណៈធម្មយាត្រា បានយកវត្តប្រណិប័តន៍ ធម្មបដិសណ្ឋារកិច្ច ក៏បានថតរូបអនុស្សាវរីរ៍ និងបាននិមន្ត-អញ្ជើញនមស្ការបូជាថ្វាយបង្គំព្រះបរមសារីរិកធាតុព្រះសម្មាសម្ពុទ្ធ ដែលតម្កល់លើមហាសុគន្ធកុដិផងដែរ ។
ដោយតេជានុភាព នៃវត្តប្រណិប័តន៍របស់គណៈប្រតិភូក្នុងព្រះសាសនាដ៏ផូរផង់នេះ សូមឲ្យមហាកុសលនេះ បានជាឧបនិស្ស័យបច្ច័យរួចចាកវដ្តទុក្ខ ដល់នូវព្រះនិព្វាន និងសូមឲ្យវឌ្ឍនភាព នៃព្រះពុទ្ធសាសនាបានផ្សព្វផ្សាយរុងរឿងចម្រើនទូទៅពេញសកលលោក និងសូមឲ្យលោកទាំងមូលមានសុខសន្តិភាពតរៀងទៅ ។
ពិធីធម្មបដិសណ្ឋារកិច្ចបានបញ្ចប់ ភត្តកាលថ្ងៃត្រង់ក៏បានឈានចូលមកដល់ព្រះសង្ឃ សីលវន្ត និងសីលវតី និមន្ត-អញ្ជើញគោចរបិណ្ឌបាតភត្តតាមលំដាប់រៀងដូចសព្វដងផងដែរ ។ អនុមោទនា ! សាធុ សាធុ សាធុ !
